Ile aýdanyna qarasty Aqsaı aýyldyq okrýginde jalpy sany 22 myń halyq turady. Aýyldyq okrýgte birneshe razezderge bólingen 13 saıajaı ornalasqan. Olarda 8 jarym myńnan astam halyq mekendeıdi. Osy saıajaılar boıynsha 522 oqýshy tasymaldanyp oqytylady, dep jazady Egemen.kz.
Memlekettik avtobýstar bekitilgen marshrýtqa saı arnaıy beketterge deıin ǵana barady. Odan ári júrýge saıajaı kóshelerinde múmkindik joq. Sebebi, saıajaı kósheleri avtokólik júrýge arnalmaǵan. Saldarynan oqýshylar 1-1,5 shaqyrymdap jaıaý júrýge týra keletini ata-analardy alańdatqan.
Bul máseleni sheshý úshin oblys ákiminiń birinshi orynbasary Nurlan Ábdirahym kelip, jergilikti turǵyndarmen kezdesti. Kezdesý barysynda ol naqty sharalardy tanystyrdy. Sonyń bastysy, 16 qyrkúıekten bastap qosymsha úsh avtobýs jolǵa shyǵarylady, al marshrýt 1,5 shaqyrymǵa uzartylyp, turǵyn alabyna jaqyndatyldy.
2026 jyly bul saıajaılarǵa aýyldyq okrýg mártebesi beriledi. Bul qadam áleýmettik nysandar salýǵa múmkindik jasaıdy.
Jergilikti belsendiler ótinishterine oblys basshylyǵynyń der shaǵynda nazar aýdarǵany úshin alǵystaryn bildirdi.
«Bizdiń máselemizge kóńil bólip, naqty sharalar qabyldaǵandaryńyzǵa rızashylyq aıtamyz», – dedi «Mereı» saıajaıynyń turǵyny Erlan Janseıituly.
Almaty oblysy.